O alcalde de Pontevedra, Miguel Anxo Fernández Lores, remitiu este venres unha carta ao presidente da Deputación, Luís López, na que denuncia a "grave discriminación" que, ao seu xuízo, sofre a cidade na repartición de axudas provinciais. O rexedor sostén que a capital "perdeu peso" nas transferencias da institución en comparación con anos anteriores e con municipios de menor poboación.
Na misiva achega unha serie de datos extraídos da contabilidade oficial da Deputación na que se constata que Pontevedra pasou de ocupar o segundo posto na distribución de fondos do plan +Provincia en exercicios anteriores a situarse en décima posición en 2024. Trátase de "unha cuestión de dignidade e respecto cara ao Concello de Pontevedra", que debe "defender o seu status de capital da provincia", afirma o alcalde.
A liquidación dos orzamentos provinciais de 2024 revela que dez municipios recibiron máis fondos que Pontevedra: Vigo (7,6 millóns de euros), Lalín (3,2 millóns), Vilagarcía (3,1), A Estrada (2,95), Tomiño (2,65), Sanxenxo (2,62), O Porriño (2,57), Moaña (2,53), Marín (2,53) e Ponteareas (2,52 millóns). A asignación á capital provincial situouse en 2,5 millóns de euros.
"Non se trata dunha disputa partidista nin moito menos dunha discusión por uns miles de euros máis ou menos", aclarou Lores, subliñando que nesa lista hai concellos de todos os signos políticos. Na carta enviada a Luís López, o alcalde lembra que desde 1999 ata 2023 a Deputación "sempre tivo a consideración de tratar ao Concello de Pontevedra como lle corresponde" pola súa capitalidade e poboación.
Un trato, di, que se mantivo tanto baixo presidencias do PP como na etapa de coalición PSOE-BNG. "Nunca outros concellos con moita menor poboación e sen o status de capitalidade pasaran por diante de Pontevedra nas cantidades transferidas", lamenta. Lores cita como exemplo de colaboración institucional nas etapas das presidencias de Manuel Abeledo, Rafael Louzán ou Carmela Silva. "Sempre existiu respecto e equilibrio institucional", sostén.
Escribe tu comentario