Cáritas alerta do aumento de persoas sen vivenda e pide empatía ante unha crise que se agrava: "Calquera pode quedar sen fogar"

Cáritas Diocesana de Mondoñedo-Ferrol celebrou no mediodía deste xoves o acto central da súa campaña anual adicada ás persoas sen fogar, pondo o foco na necesidade de visibilizar esta problemática social e de reivindicar o dereito fundamental a unha vivenda digna. A psicóloga do Centro de Día Gabriel Vázquez Seijas de Cáritas, María Méndez, alertou de que a situación do sinfogarismo "empeorou" tanto en Ferrol como no conxunto de España.

Méndez sinalou a gravidade do problema da vivenda, marcado pola escaseza de oferta, o aumento de prezos e a especulación inmobiliaria, o que dificulta o acceso mesmo á primeira vivenda para moitos cidadáns. A continuación, detallou que os perfís que acoden ao centro de día --que atende a unhas 70 persoas diariamente para cubrir necesidades básicas-- diversificáronse.

Entre eles, destacan persoas "moi novas, de 20 a 30 anos", que saíron de centros de menores sen un recurso residencial, así como unha poboación "moi grande de persoas que están en situación irregular", buscando a regularización tras percorrer outros países. Tamén atenden a persoas con patoloxías que quedaron en situación de máxima vulnerabilidade, mesmo sen un lugar onde ir ao saír do hospital.

A PEGADA NA SAÚDE MENTAL

Respecto da saúde mental, a falta dun teito deixa pegadas profundas, sendo a principal unha "desorientación no sentido da vida" e unha "tensión de cada día". Méndez destacou especialmente o risco de sufrir agresións, violacións e todo tipo de violencia para as mulleres á intemperie. Cáritas intervén abordando á persoa "de maneira integral", mobilizando recursos económicos, residenciais, como o albergue, e xurídicos. "A nosa idea sempre é desde os dereitos, desde traballar desde os dereitos a unha vida digna e a unha asistencia social", afirmou a responsable.

Finalmente, a psicóloga de Cáritas fixo un chamamento á sociedade para eliminar o prexuízo de que as persoas sen fogar buscáronse a súa situación. Pediu empatía e recoñecer que esta é unha situación que pode atravesar "calquera persoa, de calquera status social". A campaña de Cáritas, que busca visibilizar e humanizar esta realidade, manterá unha exposición fotográfica, ata o vindeiro xoves, no Cetro Cultural Torrente Ballester de Ferrol.