A compravenda de vivendas incrementouse un 7,1% en Galicia en agosto, en comparación co mesmo mes de 2024, ata un total de 1.935 operacións, segundo datos publicados este xoves polo Instituto Nacional de Estatística (INE), recollidos por Europa Press. Estas cifras contrastan coas rexistradas a nivel nacional, xa que de media a compravenda de vivendas caeu un 3,4% en toda España no oitavo mes do ano, con 47.697 transaccións.
Por provincias, todas as rexións galegas contabilizaron aumentos excepto A Coruña, que baixou un 4,4%, con 905 compravendas. Lugo foi a que máis subiu, disparándose alí case un 80%, ata 293 operacións. En Ourense e en Pontevedra asináronse 199 e 538, un 5,8% e un 5,9% máis, respectivamente. Pola súa banda, en agosto en Galicia transmitíronse 16 vivendas por doazón, un 42,8% menos, así como sete por permuta, un 133% máis e 805 por herdanza, un 3,1% menos que hai un ano.
DATOS NACIONAIS
A nivel nacional, a compravenda de vivendas baixou en agosto un 3,4% respecto ao mesmo mes de 2024, ata un total de 47.697 operacións, a menor cifra para un mes de agosto desde 2020, sempre segundo datos do INE. Co descenso rexistrado no oitavo mes do ano, a compravenda de vivendas rompe con 13 meses consecutivos de alzas interanuais.
O retroceso interanual da compravenda de vivendas en agosto foi consecuencia da caída das operacións sobre vivendas usadas, que baixaron un 4,9% interanual, ata as 37.574 operacións. Por contra, as compravendas realizadas sobre vivendas novas creceron un 2,9%, ata as 10.123 operacións.
O 93,4% das vivendas transmitidas por compravenda o pasado mes de agosto foron vivendas libres e o 6,6%, protexidas. En total, a compravenda de vivendas libres baixou un 2,6% interanual, ata as 44.548 operacións, en tanto que a compravenda de vivendas protexidas diminuíu un 12,6%, ata sumar 3.149 transaccións.
En taxa intermensual (agosto sobre xullo), a compravenda de vivendas esborrallouse un 26,3%, con descensos do 25,8% para as vivendas novas e do 26,5% para as usadas. Nos oito primeiros meses do ano, a compravenda de vivendas aumentou un 16,1%, con avances do 26,1% para as vivendas novas e do 13,5% para as usadas.
Escribe tu comentario