Trasladan a unha muller ao hospital por un incendio na cociña da súa casa en Poio

Unha muller foi trasladada ao Hospital de Montecelo por un incendio na cociña da súa casa no municipio pontevedrés de Poio, concretamente na Avenida da Barca. Segundo informou o 112, tivo constancia do suceso ás 22.40 horas deste luns, a través de chamada dun particular que alertaba de que ardía a cociña da súa veciña. Indicaba, ademais, que lograran sufocar as chamas cun extintor, pero que a muller necesitaba asistencia sanitaria. O servizo solicitou a intervención de Urxencias Sanitarias de Galicia-061, que se encargou do traslado da afectada. Tamén se informou aos Bombeiros de Ribadumia, ao GES de Sanxenxo, á Garda Civil e aos efectivos de Protección Civil de Poio.