A Lei de medidas fiscais e administrativas que acompaña aos orzamentos da Xunta para 2026 introduce cambios na Lei de Protección da Paisaxe para "dar prioridade" á construción e explotación dos parques eólicos e ao desenvolvemento das súas infraestruturas de evacuación.
A coñecida como lei de acompañamento das contas autonómicas engade unha disposición adicional á Lei 7/2008, do 7 de xullo, de Protección da Paisaxe de Galicia para declarar "o interese público superior" dos parques eólicos e das súas infraestruturas de evacuación en relación coa normativa de protección da paisaxe.
Deste xeito, esta "declaración de interese público superior" terase en conta como elemento de "singular relevancia ao ponderar os intereses xurídicos de cada caso na emisión dos informes de impacto e integración paisaxística previstos na normativa" da paisaxe, así como nos procedementos de avaliación ambiental necesarios para a autorización dos proxectos nos que se valore esta integración paisaxística. Por iso, segundo os cambios introducidos, darase "prioridade" á construción e explotación dos parques e ao desenvolvemento das súas infraestruturas de evacuación.
Ademais, os cambios introducidos a través desta disposición adicional na Lei de Protección da Paisaxe sinalan que se considerará que a instalación destes parques é compatible cos obxectivos de calidade paisaxística recollidos nas Directrices da Paisaxe de Galicia. Así, "só se considerara a existencia de impactos paisaxísticos críticos nos casos excepcionais nos que a instalación de aeroxeradores en áreas de especial interese paisaxístico produza unha perda permanente da calidade das condicións ambientais, sen posible recuperación tras o cesamento da actividade, mesmo coa adopción de medidas protectoras ou correctoras".
Os TRIBUNAIS "OUTORGARÁN PRIORIDADE" Aos PARQUES
Na exposición de motivos da coñecida como Lei de acompañamento a Xunta lembra os instrumentos normativos aprobados a nivel europeo para acelerar o despregamento das enerxías renovables como "instrumentos cruciais" contra o cambio climático e subliña que se introduce o "mandato claro" de que, en todo proceso de ponderación dos intereses xurídicos implicados tanto polos tribunais nacionais como polas autoridades encargadas da concesión das autorizacións, se outorgue " prioridade" á construción e explotación de instalacións de enerxía eólica, sempre que se apliquen adecuadas medidas de mitigación ou restablecemento.
Neste punto, lembra que o regulamento europeo que entrou en vigor en decembro de 2022 habilitaba expresamente a aplicar os devanditos mecanismos aos procesos de autorización cando non recaese resolución definitiva.
INTERESE PÚBLICO SUPERIOR DAS RENOVABLES
Sobre este aspecto, a Lei que acompaña ás contas para 2026 modifica a Lei de medidas que acompañou aos orzamentos de 2024 para engadir unha modificación interpretativa ao artigo 36 da citada norma que xa declaraba o interese público superior das enerxías renovables.
Aínda que non cambia o fondo, aclárase o alcance desta declaración ao subliñar que a presunción de interese público superior será permanente ata alcanzar a neutralidade climática e que se debe aplicar a todos os proxectos sen autorización definitiva antes do 30 de decembro de 2022.
Escribe tu comentario